Зонско паркирање во четири скопски населби

Јавното претпријатие „Градски паркинг“ не се откажува од планот за воведување зонско паркирање во населбите каде што во моментов нема, на пример, во Kисела Вода, како и во делови од Kарпош, Дебар Маало и Буњаковец. И лани овие планови биле во игра, но не биле реализирани како дел од најавените инвестиции, пренесува „Дневник“.

За оваа година раководството планира да оформи нови 1.213 паркинг-места на неколку локации во главниот град, најавуваат од „Градски паркинг“. Од оваа бројка речиси половината, 605 места, се водат како дел од катната гаража „Тодор Александров“, која сеуште е во изградба, но за некое време ќе биде ставена во функција.

Локации кои „Градски паркинг“ планира да ги претвори во паркиралишта, јавни и зонски, се, на пример, улицата Јуриј Гагарин кај Министерство за економија, каде што секој ден владее голем сообраќаен хаос, поранешен „Дрводекор“, дел од „Kлимент Охридски“, како и локациите со кои порано стопанисуваше центарското претпријатие „Паркинзи на Општина Центар“ во Дебар Маало и во Буњаковец, а потоа му беа поништени поради некомплетни сообраќајни проекти. Во Kисела Вода зонско паркирање е најавено на улиците: Индустриска, Антон Попов, Емил Зола, Иван Kозарев и Вера Јоциќ. Сите овие нови места ќе се водат во третата зелена зона каде што еден час паркирање е 25 денари.

Доколку ја исполнат својата намера годинава, тогаш „Градски паркинг“ ќе располага со вкупно 8.717 паркинг-места. Бројките покажуваат дека и покрај затворените паркиралишта лани и годината пред неа, поради низа градежни работи во централното подрачје, сепак претпријатието успева да отвори нови паркиралишта на улиците или да стави во функција објекти, како катната гаража кај „Рамстор“.