Железничка линија Баку – Тбилиси – Карс

Челниците на Азербејџан, Турција и Грузија ја пуштија во сообраќај железничката линија долга 826 km, која поврзува три држави и воспоставува врска помеѓу Европа и Кина заобиколувајќи ја Русија. Капацитетот на оваа нова линија е милион патници и пет милиони тони стока годишно.

Трите држави исто така ги поврзува и нафтоводот Баку – Тбилиси – Џејхан, како и гасоводот Баку – Тбилиси – Ерзурум, но трговските врски меѓу Турција и регионот на Кавказ сепак се ограничени. Новата железница се очекува да го поттикне економскиот развој на регионот. Вкупните трошоци на проектот надминале една милијарда долари, при што најголем дел е обезбеден од државниот нафтен фонд на Азербејџан.