Зелена и цветна оаза на булеварот „Св. Климент Охридски“

На местото на запуштениот простор кај булеварот „Св. Климент Охридски“, спроти бензинската пумпа „Макпетрол“ на улицата „Орце Николов“, општина Центар направи нов мини парк.

Со новото хортикултурно уредување, центарци и сите жители кои поминуваат тука, имаат чувство дека се наоѓаат во мала оаза во урбан простор.

Паркот е уреден во модерен, геометриски стил со високи дрвја, со обликувана крошна во вид на квадрат, а под нив се насадени геометриски распоредени зимзелени растенија. Новото зелено катче во општина Центар е со површина од 650 м2, со засадени 420 садници од девет различни видови. Дел од нив се зимзелени садници и грмушки, листопадни грмушки, а дел се цветни, со прекрасни розови и бели цветови.

Просторот го красат 12 платани и два индиски јорговани, со крошна во вид на чадор, поставени на квадратна основа. 

Бојата на паркот ќе биде секогаш зелена. На целиот дел е поставен тревен бусен, а за одржување и за поубав изглед на зеленилото, има автоматски систем за налевање. Дел од паркот ќе биде колоритен, со цветни и зимзелени грмушки, кои ја менуваат бојата во сезони.