Во судирите меѓу Анкара и Курдите разорен древен град на листата на УНЕСКО

Кога Обединетите нации минатата 2015 година на својата листа на Светско наследство ги ставија древните делови од Дијарбекир окружени со ѕидините од периодот на Римското царство, со тоа беа крунисани десетгодишните напори во обновувањето на подрачјата разорувани од војните, но откако на југоистокот од Турција повторно избувнаа судирите меѓу турските безбедносни сили и курдските бунтовници, древниот дел од градот Сур е многу оштетен.

Дијарбекир е мнозински курдски град чиешто старо градско јадро е опкружено со ѕидини долги пет километри. Откако турските безбедносни сили минатото лето покренаа повеќе „антитерористички акции“, од кои една траеше цели три месеци, во градот стар 7.000 години разорени се повеќе од 800 објекти.

Тоа сигурно ќе биде тема на состанокот оваа недела на Одборот за светско наследство во Истанбул, кој културните добра ги става на листата на УНЕСКО.

„За само една година го минавме патот до впишувањето на листата на УНЕСКО до разорувања од такви димензии што нема шанси за враќање“, изјавил Невин Сојукаја за „Ројтерс“, шеф на бирото за историско наследство во Дијарбекир, кој беше ангажиран на впишувањето на Сур на престижната листа на ОН.

Турскиот претседател Реџеп Тајип Ердоган, за разорувањето на градот ја обвинува забранетата Работничка партија на Курдистан (PKK).

Пред турската офанзива, во ѕидините беа регистрирани 1.200 историски места, вклучително и каравансараи, цркви и синагоги.

Локалните функционери велат дека веќе распишале тендери за обновување на џамиите и на црквите. Обновувањето на Сур требаше да започне во 2012 година во рамките на поширокиот владин проект за реконструкција на историските градови низ Турција, но поради бунтот на Курдите против владата во Анкара, тие се одложени.