Во Истанбул отворено најголемото воздушно пристаниште во светот

Аеродромот почнува денеска со работа. „Се надевам дека аеродромот ќе му користи на нашиот регион и на целиот свет“, рече Ердоган.

Аеродромот се наоѓа во европскиот дел на Истанбул, а предвидено е да опслужи 90 милиони патници годишно, а 200 милиони кога целосно ќе биде завршен за 10 години.

Се очекува до кајот на годинава околу 250 превозници со околу 2 000 авиони да летаат до повеќе од 350 дестинации.

Новиот аеродром во Истанбул, кој треба да го замени помалиот аеродром Кемал Ататурк на Мраморното Море, е предвидено да биде воздушна крстосница меѓу Европа и Азија, а истовремено и најголемо воздушно пристаниште во светот.

Ова е трет аеродром во Истанбул. Аеродромот „Ататурк“ кој е еден од најпрометните во Европа на крајот на годината ќе биде затворен за редовни комерцијални летови кои ќе ги преземе новиот аеродром. Првото патување од новиот аеродром ќе биде на 31 октомври кон Анкара, а првиот меѓународен лет ќе биде за Северен Кипар.

Неговата изградба почна во јуни 2014 година, а сега е завршена првата од вкупно четири фази на изградба.

Изградбата на аеродромот чини 10,5 милијарди евра. Кога целосно ќе биде завршен, ќе се простира на површина од 7 659 хектари што е околу 76 квадратни километри и ќе има шест писти со капацитет за 500 авиони. На новиот аеродром ќе биде изграден и најголемиот светски трговски комплекс без царина. Ќе има и 70 000 паркинг места.

За почеток, авиокомпанијата Туркиш Ерлајнс ќе лета само на пет дестинации, а големата преселба на воздушната патничка флота е предвидена за крајот на декември оваа година, што значи дека регуларниот воздушен сообраќај ќе стартува од новиот аеродром од почетокот на јануари.

Организацијата „Хјуман рајт воч“ извести дека најмалку 39 работници загинале додека траела изградбата во последните три години. Исто така, заштитниците на природната средина критикуваат што како жртви на изградбата на аеродромот во Истанбул паднаа стотици илјади дрвја, а огромни површини мораа да бидат расчистени.