Во борбата со загадениот воздух Мадрид го преполовува бројот на возила

Градскиот Совет на Мадрид наскоро ќе донесе Одлука за драстично намалување на бројот на моторни возила на улиците, како резултат на екстремно високите концентрации на азотни оксиди во воздухот. Шпанската престолнина со години се бори со загадениот воздух, но сепак често се случува концентрацијата на штетните материи во воздухот да биде над дозволениот максимум.

Во оваа насока, освен што се прави исчекор со намалување на бројот на моторните возила (систем пар/непар), градските власти апелираат и на почесто користење на јавниот превоз, воздржување од паркирање во центарот на градот и сл.

На забраната нема да подлежат единствено возилата од итните служби. Слична мерка мината година воведе и Париз, така што го забрани сообраќањето на возила постари од 19 години во периодот од понеделник до петок.

Во март годинава, Светската здравствена организација предупреди дека загадувањето на воздухот во последните пет години е зголемено за 8%.