Виена: Емисијата на штетни гасови во градот намалена за 26%

Градскиот Совет на Виена го усвои извештајот за реализација на „Програмата за заштита на климата на град Виена“, според која еколошките цели кои биле поставени до 2020 година, веќе се реализирани и тоа повеќе од зададените вредности.

Во споредба со 1990 година, на годишно ниво помалку се емитуваат 3,7 милиони тони еквивалент на јаглерод диоксид. Постигнато е намалување на емисијата за 26%, што е дури за 5 процентни поени подобро од зацртаната цел од 21%. Програмата за заштита на климата на Виена е усвоена во 1999, а евалуацијата ја врши Австриската агенција за енергија.

Мерките за заштита на климата постигнати се во следните области: енергетика, сообраќај, градежништво, управување со отпадот и набавките, а програмата е оценета како успешна и од економски и од еколошки аспект. За имплеметирање на климатските цели во наведените области вложени се 33,2 милијарди евра, а обезбедени се и 53.000 нови работни места.