Ван Гог цвета низ полињата со лаванда во Босна и Херцеговина

Инспириран од иконичната слика на Винсент ван Гог од 1889 година, „Ѕвездена ноќ“ , овој парк во Босна и Херцеговина е замисле од бизнисменот Халим Зукиќ. Тој своето земјиште кое се наоѓа недалеку од Високо го купил во 2018 година и го претворил во парк.

Паркот од 70 хектари сместен е во природен амфитеатар, пејзаж кој е развиван повеќе од шест години за да ги доведе уметноста и природата во хармонија. Паркот има шари во форма на вртлози и кружни аранжмани од над 130.000 грмушки од лаванда во шест живописни нијанси, проткаени со ароматични и лековити билки како жалфија, ехинацеа, пелин и камилица.

Напојувани од природни потоци, 13 езера, заедно со илјадници дрвја, го подобруваат мултисензорниот амбиент на паркот. Планирано да биде отворен во мај 2025 година, нуди искуство каде природниот пејзаж станува живо уметничко дело.

Пред шест години, Халим Зукиќ, стоејќи на врвот на ридот, ги забележал спиралните шари што ги оставаат тракторите на ливадата со сено, евоцирајќи го разбранетото небо на Ван Гог. Инспириран од оваа визија, Зукиќ тргнал да го обликува пејзажот со аматерски тим, работејќи без конкретен проект и формални планови за дизајн.

Наместо тоа, следејќи интуитивен пристап чекор по чекор, тој користел градежни машини како четки и растенија како палета. Често преработувајќи ги деловите за да се постигне природна хармонија, овој процес резултирал со брановиден терен без прави линии, притоа почитувајќи ја постоечката природна средина, пишува Designboom.

Со текот на времето, визијата на Зукиќ за „Ѕвездената ноќ“ прераснала во културно засолниште за размислување и креативно изразување. Тој го замислува засолништето како музеј на отворено, поканувајќи уметници од целиот свет да придонесат за неговиот пејзаж кој се развива. Освен оддавање почит на Ван Гог – и на оние кои ја следат нивната внатрешна визија – засолништето ќе служи и како културен центар, домаќин на уметнички програми и славење на наследството на регионот.

Босанскиот бизнисмен вели и дека бил предмет на подсмев поради неговата идеја, но дека сега овој парк е пример за тоа каква моќ и влијание може да има уметноста.