Порта3 – градежништво, архитектура и екологија Порта3 – градежништво, архитектура и екологија
Вечер во Музејот на Град Скопје ќе се отвори 17. Биенале на македонската архитектура – БИМАС 2014. Мотото на овогодишното Биенале е „Паралелни светови“. На Биеналето ќе бидат претставени 112 труда.
Селекторот на БИМАС 2014, Билјана Филиповска, за проектите истакнува: „Станува збор за мноштво од разнообразни проекти и реализации. Еден дел од нив се продукт на забрзаната комерцијализација на архитектонското творештво, особено во доменот на архитектурата во колективното домување, каде масовно изостануваат концепти во организација на станбениот простор, грижа за реалната употребна вредност на просторот во станот и вредности на хуманото живеење. Други проекти се вешти компјутерски визуелизации на архитектура која останува на рамниште на визуелното“.
Претседателката на ААМ, Сања Раѓеновиќ Јовановиќ вели: „БИМАС е единствената манифестација во Македонија која го презентира архитектонското творештво и која ги собира и запознава архитектите“ и додава: „Овогодишното Биенале на македонската архитектура се одржува во еден можеби најделикатен момент во архитектонското творештво, момент кога е многу важно многу да се зборува за архитектура, момент кога се создава архитектура која ги игнорира архитектите и се брани од нив, момент кога паралелно се создаваат два сосема спротивни света, две сосема различни слики“.
Биеналето, според Мартин Пановски, претседател на организациониот одбор, треба да биде место и повод да се започне со „здрава размена на мислења за да видиме дали и колку нашето живеење во паралелни светови доведе до наша маргинализација во општеството и, уште пострашно, до маргинализација во самиот процес на создавање на архитектурата“.
БИМАС 2014 ќе трае до 19 мај, кога на свеченост ќе бидат доделени наградите на добитниците. Во рамките на Биеналето ќе се отвори и традиционалното Биенале на студентите по архитектура во Македонија БИСТА 2014. Исто така ќе има повеќе тематски предавања на гости од САД, Германија, Словенија, Чиле, Франција, Холандија и Србија и расправи на различни теми.
