Успешно поврзување на инфраструктурата и мобилноста

Една година по изработката, седум необични автобуски постојки го ставија во фокусот на вниманието на светската архитектонска сцена малото село Крумбах (Krumbach) во Австрија. Постојките беа дизајнирани од страна на меѓународно реномираните архитекти Ванг Шу (Wang Shu), Соу Фуџимото (Sou Fujimoto) и Смиљан Радиќ (Smiljan Radic), кои работеа во соработка со локални архитекти и занаетчии.

Чудните структури на овие седум автобуски постојки го ставија селото, кое има 1.000 жители, на картата со интересни архитектонски остварувања.

Кураторот Дитмар Штајнер (Dietmar Steiner) ја пофали посветеноста и имагинацијата на оние што беа вклучени во проектот, велејќи дека „целиот проект успеа поради тоа што беше поддржан од повеќе од 200 дарежливи луѓе“.

Тука се вклучени и архитектите што ги изведоа нивните проекти, земајќи слободни денови од нивните секојдневни обврски, без да бараат за тоа парична надокнада. Ова беше нивна шанса да се вклучат во овој необичен и несекојдневен архитектонски предизвик.

Сепак, проектите за автобуските постојки не беа само заради задоволување на некакви суети; Верена Конрад (Verena Konrad), директор на VAI (Vorarlberger Architektur Institut), истакна дека проектот е важен за успешно поврзување на инфраструктурата и мобилноста во руралните области во овој дел на Австрија.