Трансформирање на куќа: Од класичен викторијански стил до скулптурално извајан простор

Со создавање дополнителен простор преку осмислено проширување, стара семејна куќа е претворена во дом богат со уметнички детали, бои и текстури.

Во центарот на Торонто се наоѓа Flow House, викторијанска куќа преуредена за пар уметници и нивните деца. Трансформацијата на оваа куќа стара 130 години вклучувала и создавање на дополнителен простор за живеење на задниот и првиот кат од куќата, подобрување на врските со надворешниот простор и модернизирање на внатрешноста и задниот двор.

Класичната предна фасада останала иста, додека внатрешноста и задната фасада со дворот се значително променети, така што сега ја отсликуваат уникатноста на семејството, нивните занимања и заеднички интересирања.

Овој интересен проект, полн со контрасти, но и комплементарност, потпишан е од повеќе пати наградуваното, мултидисциплинарно канадско биро Dubbeldam Architecture + Design, познато по создавањето иновативни, уникатни и еколошки одговорни дизајнерски решенија за живот, работа и забава.

И покрај тесната основа од само 5 метри ширина, со внимателно поставување на дополнителната површина од 230 квадратни метри, куќата сега има доволно простор, па дури и изгледа поголема отколку што е. За ова придонела и стратегијата на компресија и експанзија – тесните меѓупростори изгледаат стиснато, создавајќи чувство на компресија, а потоа се отвораат во поголеми простори со високи тавани.

Покрај сеприсутната естетика на флуидните форми, во изразен контраст со правоаголните основи, внатрешните елементи на куќата изгледаат како да се скулптурно обликувани, а не класично градени.

Спиралните скали што ги поврзуваат сите катови се фокусна точка што создава чувство на проток, поради што куќата и го добила името Flow House. Облеани во природна светлина од сводовите горе, заоблените огради и дабовите скалила фрлаат променливи сенки во текот на денот, создавајќи специфична динамика на просторот.

Впечатливите, скулптурални скали функционираат и како светлосен тунел, вовлекувајќи ја природната светлина длабоко во ентериерот.

Алудирајќи на професијата на еден сопственик на куќа кој е керамичар, концептот на тактилност и занаетчиски пристап продира во куќата преку материјали, форми и текстури. Во комбинација на скандинавски и медитерански влијанија, дрвените кабинети, преградите и подните облоги во топол бел даб се истакнати со бетон и мермер, антички бакарни детали и рачно обликувани керамички светилки.

Чистата позадина на белите ѕидови и полици е празно платно за прикажување на семејната колекција на уметност, таписерии и скулптури од локални уметници, заедно со артефакти собрани за време на патувањата во странство и керамиката на сопственикот.

Боите ги оживуваат меѓупросторите на куќата – теракота плочките се поставени во рибина коска во предсобјето, додека ѕид од геометриски светло сини плочки го дефинира барот помеѓу кујната и трпезаријата.

Големите прозорци и светлосните тунели обезбедуваат многу светлина, природна вентилација и врска со надворешниот простор. Вратите од махагони од подот до таванот, со лизгачко стакло на третиот кат, овозможуваат пристап до терасата на покривот, додека слично високите врати во кујната водат до опремениот заден двор.

Слични просторни стратегии применети се во дизајнот на задниот двор. Сивите волумени на панелот на новата задна фасада се повлечени навнатре за да се создаде простор за терасата на покривот. Во задната градина, компресија и експанзија дополнително се истражуваат преку цветните леи кои се отвораат до пошироки простори проектирани за игра, јадење и релаксација. Дрвена пергола, тула и окер градинарски мебел, надополнети со бујни растенија, создаваат релаксирачки простор за одмор во текот на целата година.

Низ целиот простор, кој непречено тече низ неговите заоблени флуидни форми, има и моменти на изненадување и задоволство – спојување на внатрешни и надворешни простори, внесување на природна светлина на неочекувани места и разиграно обликување на елементи кои даваат карактеристична уметничка и органска димензија на оваа куќа.