Трансформација на стан во Сао Паоло во современо уметничко царство со урбана градина

Со трансформација на неокласичен стан создаден е модерен простор за живеење, исполнет со уметнички дела и зеленило. Хармоничната комбинација на уметност и урбан живот надградена е со фантастична урбана градина, за целосно уживање во оваа урбана оаза.

Во Сао Паоло, економската престолнина на Латинска Америка и срцето на бразилската архитектонска сцена, се наоѓа овој стан со површина од над 500 квадратни метри. Под името Project AQH, проектиран е од тимот на Coletivo Arquitetos.

Со овој проект постоечкиот, неокласичен стан е трансформиран на начин да се добие современ простор за живеење со уметнички дух. Водејќи се со таа цел, ѕидовите се срушени, а внатрешноста е целосно реорганизирана за да се овозможи подобра интеграција и проток меѓу собите. Само две од оригиналните спални се задржани.

Станот е осмислен од почетокот, така што вклучува простори усогласени со модерниот начин на живот и вкус на новите станари, млад пар со заедничка страст за уметност и природа.

Желбата на сопствениците и основната премиса на проектот „живот со уметност и градина“ е идеја која се рефлектира низ целиот простор, интегрирајќи ги низ целиот простор природните елементи и дизајнерските парчиња.

Во просторот со отворен план, ТВ-собата е решена така што може да се затвори за гледање филмови, а по потреба може да се отвори во поголема дневна соба, при што лизгачкиот ѕид целосно исчезнува.

Сите слободни ѕидни површини, вклучувајќи го и бетонското јадро што е користено како ротирачка витрина, искористени се како галерија за уметнички дела од многубројни познати автори.

Дизајнерскиот мебел и осветлувањето го следат овој уметнички израз, придонесувајќи за создавање на уникатен и инспиративен амбиент, каде дизајнот и уметноста заедно го формираат јадрото на модерниот живот.

Посебно внимание е посветено на дизајнот на осветлување. Светлечките топки, употребени на повеќе места и опкружени со зеленило, додаваат скулпторски елемент во просторот и создаваат драматичен визуелен ефект. Овие топки не се само осветлување, туку вистински уметнички дела кои се истакнуваат во просторот.

Отвор во бетонската конструкција води до винарска визба со проѕирни акрилни ѕидови, што го прави виното ѕвезда на вечерта. Кујната од нерѓосувачки челик се надоврзува на модерниот дизајнерски израз.

Со формирањето на градина со овошни дрвја на балконот, проектантите постигнале станот да добие топлината и привлечноста на приватна куќа, среде урбаното опкружување на Сао Паоло. Овој зелен рај не само што обезбедува чувство на мир и поврзаност со природата, туку служи и како бариера помеѓу просторите за живеење и хоризонтот на градот, обезбедувајќи непречена транзиција помеѓу внатрешните и надворешните простори.

Освен што обезбедува оаза на зеленило, урбаната градина игра клучна улога во подобрувањето на квалитетот на животот. Жителите можат да уживаат во свеж воздух, овошје од нивните овошни дрвја и релаксација во природното опкружување во рамките на домот. Оваа хармонична комбинација на природата и урбаниот живот создава уникатна и инспиративна средина која промовира благосостојба и креативност.

Преку посветено проектирање архитектите од Coletivo Arquitetos, со внимание на деталите, првобитниот стан го трансформирале во урбана оаза која е модерен дом, но и израз на стил и животна филозофија кои го прават модерниот начин на живот во Сао Паоло привлечен и инспиративен.