Термоцентралите во светот трошат вода еднаква на потребите на една милијарда луѓе

Сите термоцентрали во светот трошат количина на вода која е доволна за задоволување на основните потреби на една милијарда луѓе на нашата планета, стои во извештајот на „Greenpeace“, во кој се осудува огромната потрошувачка на вода во индустрискиот сектор, особено во енергетиката базирана на јаглен. Невладината организација предупредува на изградбата на нови термоцентрали, одговорни за огромниот притисок врз главните речни басени во светот, и конечно за недостатокот на вода во одредени региони.

Во истражувањето чии резултати се објавени под насловот „Големата кражба на вода: Како индустријата на јаглен ја продлабочува глобалната криза на водните ресурси“, „Greenpeace“ ги повикува владите да преземат сериозни мерки и да се свртат кон одржливи енергетски политики, бидејќи за неколку децении ќе биде предоцна. Во извештајот е нотирано дека денес во светот работат 8.359 термоцентрали, а во моментот околу 2.600 се во фаза на проектирање или изведба.