Течна бетонска форма за уметнички простор во Индија

Малтер во боја на теракота направен од локален песок ја покрива заоблената, бетонска структура на Hampi Art Labs, уметнички центар во Карнатака, Индија, дело на архитектонското биро Sameep Padora & Associates.

Hampi Art Labs е проектиран од Sameep Padora & Associates за да изгледа како да е „роден од својата околина“ во близина на селото Хампи, место на светско наследство на УНЕСКО во Индија, познато по своите историски хиндуистички храмови.

За да го постигне ова, архитектите земале траги од топографијата и историјата на областа, како и нејзината модерна состојба како поиндустриски развиена област.

Брановидната форма на Hampi Art Labs упатува на блиската река Тунгабхадра, додека неговата препознатлива боја е постигната со користење на железен оксид добиен од блискиот JSW Vijayangar Works – еден од најголемите капацитети за производство на челик и цемент во Индија. Земјата ископана од овој објект е користена и како оплата за бетонот.

„Неверојатниот речен пејзаж на реката Тунгабхадра и нејзиното нежно извајување на околните ридови беа инспирација за Hampi Art Labs“, изјави за Dezeen основачот на бирото Sameep Padora.

„Со индустрискиот погон JSW во близина, имавме пристап до челик и цемент за зградата, а ја користевме ископаната земја од самата локација за да направиме оплати за лиење на течните форми на објектот“, додаде тој.

Инвеститор на Hampi Art Labs е Фондацијата JSW – огранок на индискиот конгломерат JSW Group – за производство и изложување на уметнички дела.

Обезбедува работилници за графика и вајарство во камен и метал заедно со галерии и едукативни простори за училиштата и локалната заедница.

Мазни, бело малтерисани ѕидови внатре во центарот ја отсликуваат заоблената форма на екстериерот, додека застаклувањето со целосна висина гледа на малите градини создадени со кривулестата основа на објектот.

„Формата на зградата е апстрактен ‘простор на текови’ низ кој се движат луѓето“, вели Padora.

„Галериските простори се нетипични, испрекинати со дворови кои внесуваат природна светлина во ентериерите на она што инаку би биле стандардни линеарни простори на црни кутии“, додава Padora.

Hampi Art Labs е отворен за јавноста на 6. февруари 2024 година со „Right Foot First“, изложба на дела од колекцијата на Sangita Jindal, претседателка на JSW Group, која иницира проекти за општествен развој.