Тадао Андо создаде своја столица од соништата

Познатиот јапонски архитект Тадао Андо го „замени“ бетонот со дрво, за да создаде своја идеална столица! Наречена Dream Chair, оваа столица претставува резултат на соработката на Carl Hansen & Søn и јапонскиот архитект во која ги истражувале многуте својства на дрвените конструкции.

Според мислењето на дизајнерите, за да се добие идеална форма доволно е еден природен материјал само да се свитка. Архитектот познат по своите минималистички бетонски конструкции размислува на сличен начин и затоа го избрал дрвото за да создаде своја столица од соништата.

Рамката со дебелина од 10 милиметри и база чија дебелина варира помеѓу 10 и 27 милиметри, биле направени од обработена иверица, која била изложена на притисок од пареа на температура од 120 Целзиусови степени од 50 минути. Задачата била да се направи доволно широка и вдлабната иверица за да се задоволат желбите на архитектот. „На крајот малку сме го приспособиле дизајнот, и ги пречекоривме границите на вообичаените својства на овој материјал”, изјавиле од архитектонското студио. „Како резултат добивме нешто што нема конкуренција на пазарот“.