Судски постапки за неисполнување на Директивата за енергетска ефикасност

Европската комисија објави дека ќе покрене судски постапки против: Хрватска, Ирска, Летонија, Романија и Австрија доколку во целост не ја спроведат Директивата за енергетска ефикасност.

Како што е пропишано, сите држави членки на Европската Унија мораа до 5 јуни 2014-та, оваа Директива да ја транспонираат во своите национални законодавства, но овие земји сè уште не го сториле тоа. На минатонеделното заседание на Европската комисија, одлучено е дека ако во рок од два месеци не биде исполнета оваа обврска, Европската комисија ќе покрене судска постапка против нив и ќе побара парична казна. Директивата за енергетска ефикасност пропишува дека до 2010 година мора да се постигнат определени заштеди на енергија, и да се подобри енергетската ефикасност по одделни сектори. Инаку, Европската комисија минатата година покрена постапка против 27 држави членки на Европската Унија поради неисполнување на обврските од Директивата за енергетска ефикасност.