Станица за полнење која повторно ја воспоставува идејата дека луѓето се составен дел од природата

Бирото EFFEKT со седиште во Копенхаген заврши со модуларната станица за полнење со дрвена рамка во Sønderborg, Данска.

Наречен Better Energy Charge, проектот ја трансформирал конвенционалната бензинска пумпа во парк кој е проектирана да донесе беспрекорно и привлечно искуство за мобилност.

EFFEKT ја проектирале новата станица за брзо полнење за електрични возила (EV) со органски дизајнирана дрвена рамка.

Завршен како прв пилотпроект за компанијата за обновливи извори на енергија Better Energy, проектот има за цел „да се справи со актуелните предизвици на усвојувањето на електрични возила и инфраструктура за полнење низ Европа, истовремено промовирајќи ја синергијата помеѓу обновливите извори на енергија, еколошката свест и технологијата“.

Архитектите го опишуваат проектот како „различен од традиционалните бензински пумпи кои се потпираат на материјали кои интензивно користат јаглерод, како што се бетон, челик, асфалт и стакло“.

Поради своите пропустливи површини, простори за рекреација во природната околина и биобазирани материјали, станицата за полнење вклучува локални екосистеми и живеалишта за дивиот свет и растенијата.

Според бирото, „оваа интеграција ќе стане уште поочигледна на пролет, кога мешавина од дива ливадска флора ќе го опкружи паркот – нудејќи им на корисниците искуство во природата во биоразновиден простор- правејќи го искуството на полнење повеќе од само практичност“.

Клучните карактеристики на проектот се неговата модуларност и склопените и расклопените компоненти. Обвиткана со големо вкрстено ламелирано дрво, структурата придонесува за помали емисии на CO2 во атмосферата во текот на целиот животен век.

„Една од главните дискусии што денес ги водиме во Европа се однесува на отпорот кон примената на технологијата за зелена енергија. Меѓутоа, технологијата не мора да биде во спротивност на природата; всушност, таа е предуслов за зачувување на природниот свет и екосистемите од кои сме целосно зависни“, вели коосновачот и креативен директор на EFFEKT, Sinus Lynge и додава: „Ако повторно ја воспоставиме идејата дека луѓето се составен дел од природниот свет, архитектурата и инфраструктурата стануваат средства за проектирање на односите меѓу човекот и природата на нов начин“.

„Се надеваме дека со проектот за Better Energy Charge ќе им покажеме на Данците и Европјаните дека можеме да ја користиме технологијата за повторно да се поврземе со природата ако внимаваме на правилен проект“, продолжи тој.

Инспириран од заоблените ленти за автомобили кои ја сочинуваат основната функција на станицата за полнење, органскиот облик на станицата е проектиран да го сигнализира преминот од фосилни горива на обновлива енергија.

„Сакавме дизајнот на павилјонот да биде органски и привлечен, како данскиот класичен дрвен мебел. Користивме материјали од природата – конструкцијата е изградена од вкрстено ламелирано дрво, кое го врзува CO2 од атмосферата во текот на целиот негов животен век“, објаснува Sinus Lynge.

Принципите за одржливост се применети во текот на целиот животен циклус на станицата, ставајќи ја употребата на масивно дрво во прв план, минимизирајќи го отпадот и зголемувајќи ја приспособливоста.

Тимот осмислил модуларен мрежен систем кој овозможува лесно проширување или намалување за да се приспособи на различни барања на локацијата. Исто така, овозможува лесно расклопување и пренаменување на градежните компоненти.

„Со Better Energy Charge, имавме можност да го преиспитаме искуството за мобилност со вклучување на најдобрите пракси од секторот енергетика, екологија и градежништво. На електричните автомобили им треба одредено време да се наполнат, така што, покрај основните капацитети за полнење, тоа беше важно размислување дека станицата нуди квалитетни услуги и рекреативни области во природно опкружување за возачите и патниците да се одморат и релаксираат“, вели Sinus Lynge.

„Електричните автомобили се тивки, немаат штетни емисии и не истураат нафта и бензин. Ова ни овозможи да се залагаме за еко карактеристики, како што се зелениот кров и цветните леи кои апсорбираат дождовница и пропустливиот асфалт што ги замаглува границите меѓу зелената околина и областите за возење“, додадава.