Стаклена платформа за авантуристи на облакодер во Чикаго

Новата атракција е поставена во облакодер во Чикаго и се однесува на посетителите што не се плашат од авантури и височини. Опсерваторијата „360 Чикаго“, порано позната како опсерваторија „Џон Хенкок“, поставила платформа за набљудување, која малку се разликува од типични платформи. Таа постепено се навалува надвор од масата на облакодерот под агол од 30 степени на височина од 305 метри.

Идејата е замислена од страна на инженерска компанија Thornton Tomasetti, која сакала да им овозможи на посетителите на опсерваторијата ново искуство со кое тие можат да ги тестираат сопствените граници. Се разбира, такво нешто барало долго планирање и развој. Оригиналните цртежи на облакодери морале да бидат проучени заедно со мерките на постоечката платформа. Процесот на проектирање барал континуирани прегледи и ревизија.
Почетната изработка на челичната конструкција била завршена во февруари оваа година, а платформа поставена на крајот на тој месец. За да се постигне тоа, западниот дел на постојната платформа за гледање морал да биде преправен со поставување на челична рамка, со поврзување на хидраулична единица и со тестирање на целата платформа.

Облакодерот се наоѓа во близина на брегот на езерото Мичиген и посетителите на опсерваторијата имаат импресивни погледи од 360 степени на цело езеро и на Чикаго. Самата платформа може да прими осум корисници во исто време и се придвижува со помош на хидраулични цилиндри. Кога гостите се сместуваат безбедно во самата внатрешност, на 94 кат од зградата, платформата се навалува кон надвор прво за 19 степени, потоа за 25, и на крајот за 30 степени, заедно со набљудувачите.
Посетителите можат да ја испробаат оваа уникатна платформа, по цена од пет долари (плус редовната цена за влез во облакодерот).