Спакуван луксуз во куќарка на дрво

Куќарки на дрво веќе некое време се симбол на нови форми на сместување, главно за туристички цели или како приватни објекти за одмор. Една таква која ги имитира споменатите куќарки на дрво, но прилично луксузна, најдовме во Кејп Таун, која е своевидна референца на носталгичното детство на клиентот. За овој феноменален проект е заслужно локалното архитектонско студио Malan Vorster, а самата конструкција се состои од четири цилиндрични дрвени кули подигнати малку над земјата.

Секоја од нив може да се пофали со прозорци преку кои се пружа прекрасен поглед на шумата со која е опкружена куќарката.

Архитектите истакнуваат дека објектот е проектиран за клиент кој имал желба да поседува резиденција надвор од градот, а која во суштина би изгледала како куќарка на дрво, каква што имал во детството.

Носталгичниот момент се шири и низ самата внетрешност, особено кога станува збор за парчињата мебел. Централниот дневен простор го зафаќа првиот кат од куќата, каде што има тераса, трпезарија и главни скалила. На вториот кат е спалната соба каде што главниот збор го водат стаклените ѕидови и се што преку нив може да се види и доживее.