Порта3 – градежништво, архитектура и екологија Порта3 – градежништво, архитектура и екологија
Желбата да се надмине стравот од забар, пациентите да се чувствуваат опуштено и пријатно, а водено да се создаде максимално искористен и функционален простор со современ ентериер ја создаде стоматолошката ординација „Оникс“ во населбата Аеродром во Скопје.
Слободата на проектирање и одлучување при изборот на материјалите дадена од инвеститорот и неговото почитување на професионалци и вербата во креативноста и посветеноста на нашата работа, оставија видлив, позитивен белег во опремувањето и дизајнирањето на ентериерот. Компоненти без кои не се може, а склопени заедно го даваат конечниот производ, современ ентериер на општо задоволство на вработените, пациентите и секако и на наше задоволство како автори.
Во простор од 40 квадратни метри проектирани се чекална, работен дел за стоматолошки столови соодветно димензиониран и санитарен јазол со претпростор. Дизајнот беше оформен со чисти форми и прави линии надополнети со одредени кубусни облици.
Влезот во ординацијата е одделен со работниот дел со стаклена преграда со мат принт со мотив кој произлегува од останатите елементи во самата ординација.
Користени се материјали како во дрвен дезен и медијапан во комбинација на бела и сенф боја во делот кај работниот простор.
Во приемниот дел, каде што непријатноста на чекање да се седне на забарски стол е најголема, просторот е облагороден со 3Д керамички плочки во бела боја, ѕидна облога од иверица со огледало и пулт во бел сјаен медијапан, кој својата неправилна форма ја добива токму од овие ѕидни обработки, па со тоа се создава една компактна целина и динамичен израз на делот наменет за клиенти и создава една опуштена атмосфера.
Кај работниот дел во интерес на визуелно поголем простор, вметнато е огледалото како ѕиден декоративен елемент, дизајниран во дијагонални сегменти. Спојот помеѓу долните елементи и висечките елементи е решен со принт на стакло.
Во санитариите е избрана комбинација на бела и црна порцеланска плочка со мермерен дезен, со дрвени елементи како подлога за мијалник и жардиниера во делот кај тоалетната школка.
При реализацијата на овој проект, во целост беше почитуванa техничката документација – проектот, кој ги отсликуваше нашите идеи и замисли, а воедно и барањата и потребите на инвеститорот.
Тим на БИРО ПРОЕКТ
