„Шел“ плаќа 111 милиони долари за излевање на нафта во Нигерија пред четири децении

Мултинационалната енергетска компанија „Шел“ тврди дека излевањето на нафта пред повеќе од 40 години е предизвикано од трети страни за време на граѓанската војна. Сепак, „Шел“ се согласи да плати 111,6 милиони долари на заедниците во јужна Нигерија за излевање на сурова нафта во 1970 -тите.

Најновата одлука во врска со областа на југот на Нигерија каде се произведува нафта подразбира казна од милиони. Бројни заедници во тој дел од земјата одамна водат правни битки за излевање на нафта и штетите направени на природата во таа прилика.

“Налогот за исплата (111 милиони долари) се однесува на целосното и конечно задоволување на пресудата“, рече портпаролот на „Шел Петролеум Девелопмент“ од Нигерија.

Лусус Нвоса, адвокат што ги претставува жителите на нигериската држава Риверс, ја потврди одлуката.

“Останаа без трикови и одлучија да ги прифатат условите“, рече адвокатот.

Компанијата објави дека ги поправила излевањата предизвикани од дејствијата на трети страни за време на граѓанската војна во Нигерија во 1967-70 година, кога беа предизвикани големи штети на нафтоводите и инфраструктурата.

“Тоа е потврда дека имавме право што поставивме прашања во врска со еколошката штета предизвикана од „Шел“ на областите населени со жителите на Огони и потребата за соодветна санација на земјиштето“, се вели во соопштението на народната организација МОСОП на народот Огони.

По 13-годишна правна битка, холандскиот суд во јануари оваа година и наложи на „Шел“ да ги надомести нигериските земјоделци за излевањето што го загади поголемиот дел од нивната земја во делтата на Нигер.

Судот нареди нафтениот гигант да плати отштета на тројца од четворицата земјоделци кои поднесоа жалба до судот во 2008 година. Случајот траеше толку долго што во меѓувреме загинаа двајца нигериски земјоделци.