Сертификати за кадрите од областа на енергетската ефикасност

Македонија има стратегија според која предвидува до 2020 година енергетски ефикасни да бидат 35 проценти од јавните објекти. Еден од начините тоа да се оствари е со континуирана едукација меѓу останатите и на градежните работници. Деталите беа презентирани на настанот што беше организиран во Стопанската комора на Македонија.

– Во земјава постои кадар кој работи на енергетски ефикасни објекти, но тоа засега не е препознаено. Проектот „Билд – ап скилс“ почнува со обука на тренери кои своите вештини за енергетска ефикасност потоа ќе ги пренесат на работниците, – истакна Јадранка Аризанковска од Дирекцијата за меѓународна соработка при Комората.

Повикот е распишан пред пет дена и ќе трае до 15 март. Кандидатите треба да имаат завршено високо образование во областа на градежништвото, електроенергетиката, архитектурата и машинството, четиригодишно средно техничко или тригодишно стручно со трет степен на квалификации. Потребно е и работно искуство од најмалку пет години во струката, како и минимум две години во спроведување мерки за енергетска ефикасност.

Како што нагласи Аризанковска, од проектот треба да произлезат вкупно 200 тренери. Обуките ќе траат 10 дена, а по нивното завршување кандидатите ќе стекнат сертификати валидни и во Хрватска и во Словенија како земји-учеснички во иницијативата „Билд-ап скилс“.

Според најновите законски измени за добивање дозвола за градба, мора да се приложи и елаборат за енергетска ефикасност. Ова важи и за станбените објекти.