Rolls-Royce со визионерски концепт за автономен автомобил

На свечена церемонија во Лондон, компанијата Rolls-Royce го претстави својот визионерски концепт за автономен автомобил на иднината, кој во многу нешта е различен од досегашните.

Концептот на четири тркала наречен VISION NEXT 100, и со работен наслов 103 EX, со својата архитектура целосно се издвојува од многуте досегашни решенија, кои главно се темелат на денешните возила, но со многу елементи кои потсетуваат на денешните примероци на познатиот луксузен бренд. Големата разлика, на пример, се гледа на местото каде што денес се сместуваат огромните 12-цилиндерски мотори, а бидејќи ги нема, тука се ослободил голем слободен простор за багаж.

„Домаќинка“ во автомобилот без возач ќе биде Елинор или генерички глас кој е именуван по актерката Елинор Торнтон, за која се верува дека била инспирација за познатата фигура која го краси секој модел на Rolls-Royce.

Некои од оние кои присуствувале на презентацијата на VISION NEXT 100, 103 EX го нарекле „најгрдо нешто што го виделе досега“, но тимот кој работел на концептот не се осврнува на критиките, и убеден е дека во блиска иднина токму овој автомобил ќе им одговара на богатите.

Овој Rolls-Royce, ако заживее во сериско производство, ќе се изработува со користење само на високо квалитетни материјали во секој сегмент. Според плановите, ваков и слични автомобили се предвидени за патиштата во 2040 година.