Ретроспективна изложба на архитект Славко Брезоски во КИЦ

Во Скопје ќе биде поставена изложба по повод 100 години од раѓањето на архитект Славко Брезоски.

Изложбата ќе се отвори на 26 мај (четврток) 2022 година во 20:00 часот во просториите на Културно информативниот центар – Скопје (КИЦ), а публиката ќе може да ја посети до 16 јуни 2022.

Славко Брезоски е припадник на првата повоена генерација македонски архитекти. Присуството на оваа генерација ќе биде одбележано под знакот на „модерната“ и нејзиниот реформаторски јазик што ќе се прифати и одржи во децениите што ќе следат. Творечкиот опус на архитектот Славко Брезоски е мошне богат и разновиден. Тој дејствува во речиси сите домени на урбанистичкото и архитектонското проектирање, едукацијата, истражувањето и пубицистиката.

Неговиот архитектонски опус го сочинуваат многубројни проекти и реализации со широк програмски дијапазон и претпознатлив архитектонски израз. Успешно учествува на многубројни јавни домашни и меѓународни конкурси на кои освојува врвни награди. Притоа важно е да се истакне дека повеќето од конкурсните проекти биле прифатени за реализирање, со што Брезоски постигнува меѓународна афирмација.