Реалната потрошувачка на гориво и реалните емисии на возилата во ЕУ, за 20% повисоки од оние на тестовите во лабораториски услови

Реалната потрошувачка на  гориво и реалните емисии на CO₂ од дизелашите и бензинците, се поголеми за околу 20% од официјалните вредности на стандардизираниот тест за лесни возила, додека кај plug -in хибридните возила реалните емисии на CO₂биле во просек 3,5 пати повисоки од лабораториските вредности. Ова го соопшти Европската комисија по повод својот прв извештај за реалните емисии на CO₂на новите патнички автомобили и комби возила.

Извештајот е базиран на податоците собрани во 2021 година од уредите за следење на потрошувачката на гориво кои се инсталирани во овие возила. Првите податоци од примерок од 600.000 автомобили ги покажуваат претходно споменатите разлики, кај одделните категории возила. Со проширување на опфатот на податоци во текот на наредните години, ќе се утврди каков ќе биде трендот, одноно дали оваа разлика ќе се намалува или ќе се зголемува.

Европската комисија истакнува дека овие резултати се очекувани, бидејќи постојат различни фактори кои влијаат врз емисиите во реалниот свет, кои не можат во целост да се симулираат во лабораториски услови. Извештајот опфаќа и анализи на возниот парк  по производители.