Расте бројот на потрошувачи на природен гас во Куманово

Локалната самоуправа од Куманово го продолжува процесот на гасификација на објектите во градот. Според објавените информации на порталот „Куманово Њуз“, користењето на овој енергенс досега е обезбедено за 12 локални установи, училишта, градската библиотека и седиштето на ЕВН во Куманово, кои се приклучија на изградената гасоводна мрежа и активно го ползуваат природниот гас. Јавното претпријатие „Куманово – гас“ периодов работи на гасификацијата на бројни други објекти. „Правиме подготовки за црквите „Света Троица“ и „Свети Никола“, навлегуваме во населбата Гоце Делчев, во изградба е мрежата на улиците „Иго Тричковиќ“ и „Живко Чало“. Наскоро ќе се гасифицира и првата станбена зграда“, вели Драган Петровски, директор на Ј.П. „Куманово – гас“.