Работилница за сликање на мурал со Дијана Томиќ Радевска

Галеријата „Акантус“ организира отворена работилница за сликање на мурал со Дијана Томиќ Радевска. Оваа работилница има за цел да ја приближи техниката и процесот на сликање на мурал до скопската публика. Сликањето на муралот ќе започне во петок, 5 мај од 16 до 21 часот, а ќе продолжи во сабота и недела од 12 до 16 часот.

Дијана Томиќ Радевска е мултимедијален уметник и дизајнер. Работи на графики, сликарство, уметнички инсталации, арт видео и дизајн. Нејзиниот сеопфатен и сестран уметнички пристап, преку комбинирање на различни техники, се испирација за оваа отворена работилница. Посетителите ќе имаат можност не само да го набљудуваат процесот, туку и во интеракција со уметникот да се вклучат во неговото креирање.

Муралот како уметнички израз е дел од човековиот живот од праисторијата, а првите негови форми сведочат и за знаковниот јазик. Тој како уметничкa форма опстојува во целиот тек на човековата цивилизација, а денес го има задржано истото значење и смисла: да направи слики на општеството, кои се креирани од приказни, вредности, соништа и промени. Токму поради тоа сакаме приказните и соништата посветена на нашите посетители и нивната енергија да бидат дел од овој мурал и заеднички да уживаме во уметноста.