Порта3 – градежништво, архитектура и екологија Порта3 – градежништво, архитектура и екологија
На Факултетот за архитектура на МИТ Универзитет од 7 до 9 мај се одржа меѓународна работилница со наслов UP-CYCLING WORKSHOP. Работилницата ја организираше Факултетот за архитектура во соработка со шпанската фирма „Трансфодизајн“ чиј основач е м-р Нада Тозија Узал. На овој настан во рамките на четири дена учесниците имаа можност да се запознаат со процесот на апциклирање, пренамена на градежниот отпад во дизајнерски парчиња мебел и концептуално да ја развијат и разберат суштината на овој процес.
Цел на оваа работилница беше активација, развивање на креативноста и едукација на учесниците во врска со рециклирањето и трансформацијата на отпад во корисни предмети. Учесниците имаа можност да ги истражуваат карактеристиките (позитивните и негативните страни) на градежните материјали, да користат алати и да научат техники на обработка на материјалите. Алатот и стручниот кадар го обезбедија градежните фирми „ Жикол“ и „Аршин“.
На 9 мај беше отворена завршна изложба, а поставката на изработените предмети е изложена во просториите на МИТ Универзитет и ќе трае до 19 мај.
Наталија Пулејкова Радеска, доцент на МИТ Факултетот за архитектура, изјави: „Самиот настан разработи интересна и актуелна тема и прикажа еден нов пристап како да го промовираме еко-дизајнот и истовремено да ја развиеме креативноста. Позитивно бев изненадена од ентузијазмот за истражување и иновативните идеи кај сите учесници. Работилницата Up-cycling успеа да го разбуди имагинативниот стадиум за творење и да ја развие еколошката свест која резултираше со успешни и оригинални реализации“.
Со позитивни размислувања се изјасни и Радмила Томовска, асистент на истиот факултет: „Посебно сум задоволна и позитивно изненадена од заинтересираноста на сите учесници за оваа работилница. Освен нашите студенти се пријавија и други учесници и сите заедно работеа и беа крајно мотивирани да продуцираат што поуспешно парче мебел или предмет за декорација. Пред почетокот на работилницата за мене успех претставуваше доколку учесниците успеат да иницираат идеи и развијат издржан концепт, додека пак за реализација на идеите сметав дека учесниците нема да имаат доволно време или пак нема да можат технички да ги изведат“.
