Прва македонска термоелектрана на биогас во Тетово

  Министерот за економија Ваљон Сарачини денеска ја посети локацијата во тетовското село Требош, каде во моментов се гради првата термоелектрана на биогас во Македонија. Со органските отпадоци од преработката на месните производи од компанијата „Везе Шари“, на годишно ниво ќе се произведуваат 7.950.000 киловат – часови електрична енергија. Изградбата на биогасната електрана со инсталирана моќност од 1 мегават ќе биде завршена до септември оваа година, по што истата ќе се приклучи на македонската електроенергетска мрежа. Фирмата „Електро Шари“ во овој проект треба да вложи вкупно шест милиони евра, а досега се инвестирани околу третина од планираните средства. На реализацијата на енергетскиот објект работат околу 100 лица, а дополнителни 30 лица ќе бидат вработени со неговото официјално пуштање во употреба.

  Новата електрана на биогас ќе има двојна функција бидејќи ќе овозможи да се преработи отпадот од фармата за кокошки на „Везе Шари“ и да се зачува природната околина од овој тип на ѓубре, но и да се произведе електрична енергија што ќе ги задоволи потребите на нивната компанија. Изградбата на овој енергетски капацитет започна кон средината на август минатата година.

Повеќе информации за биогас, на следниот линк:
http://www.ceprosard.org.mk/MK/PDF/Biogas%20MK%20za%20pecat.pdf