Протести на локалните власти и екологистите во Италија против Трансјадранскиот гасовод

Италијанската полиција успеа да ги прекине протестите на еколошките активисти кои настојуваат да го спречат преместувањето на старите стебла на маслинки во регионот на Апуља, кои се наоѓаат на трасата на Трансјадранскиот гасовод (Trans adriatic pipeline TAP).

Имено, на 27 март италијанскиот Врховен суд даде зелено светло за продолжување на работите на гасоводот, отфрлајќи ја жалбата на локалните власти на југот на Апуља. Ден подоцна, околу 300 демонстранти се обиделе да ги спречат работниците да преместат околу 30 маслинови стебла на друга локација, со цел обезбедување услови за поставување на цевководите. Полицијата интервенирала и ги растерала демонстрантите, меѓу кои биле и градоначалниците на повеќе места во тој регион.

За градбата на гасоводот, предвидено е преместување на околу 10000 маслинови стебла и работите на тоа се започнати пред една година, но прекинати се поради протестите на локалните власти и еколошките здруженија. Доколку стеблата не се преместат до крајот на април, конзорциумот ТАП ќе мора да чека до ноември за да продолжи со работите.