Прошетка меѓу облаците: Отворен најдолгиот висечки пешачки мост во Чешка

По две години изградба, отворен е најдолгиот висечки пешачки мост во светот во одморалиште на североистокот на Чешка.

Наречен Sky Bridge 721, мостот кој соборува рекорди се наоѓа на планината Кралички Снежник и на пешаците им нуди прекрасен поглед, а неговата изградба чинела околу 200 милиони чешки круни или околу 8,3 милиони долари.

Истегнувајќи се, во согласност со неговото име, мостот долг 721 метар меѓу два планински сртови е на височина од 95 метри.

Чешкиот „небесен мост“ на тој начин го собори рекордот на најдолг висечки мост за пешаци од 516 метри во областа Арук во Португалија, кој беше отворен во пролетта 2021 година.

Sky Bridge 721 води од вилата Сламенка, во близина на постоечкиот висечки мост преку долината, сè до ридот Члум. Посетителите влегуваат во мостот на надморска височина од 1.125 метри, а излегуваат десет метри повисоко.

За неговата изградба употребени се 1.030 кубни метри бетон, што резултира со вкупна тежина од 405 тони, при што вкупната тежина на јажињата е 158 тони, а на помошните конструкции 20 тони.

Мостот поддржува шест главни потпорни јажиња и 60 кривулести јажиња со различен дијаметар, а самата пешачка патека е широка 1,2 метри.

Според Euronews, преку бездната истовремено можат да поминат вкупно 500 луѓе, но оваа туристичка атракција ќе биде затворена во случај на силен ветер.

Во туристичкото место Долни Морава, каде што се наоѓа Sky Bridge 721, посочуваат дека мостот е отворен за деца од сите возрасти и височини, но дека не е погоден за луѓе со колички за бебиња или корисници на инвалидска количка.

Критичарите велат дека мостот е преголем за животната средина, додека Чешката туристичка организација верува дека големиот градежен проект може да привлече туристи од целиот свет.