Промоција на првиот извештај во сенка за Поглавје 27 – животна средина и климатски промени

На 30.11.2021 со почеток во 11 часот, се одржа промоцијата на првиот извештај во сенка за Поглавје 27 – животна средина и климатски промени, изработен во рамките на граѓанската платформа на граѓански организации – Платформа 27. На настанот воведно обраќање имаа потпретседателот на владата Никола Димитров и министерот за животна средина и просторно планирање Насер Нуредини, а потоа беше презентирано секое од под-поглавјата на овој Извештај во сенка.

Извештајот дава препораки кои според граѓанските организации се важни за подобрување на состојбата со животната средина во Македонија и претставува алатка за координирање на комуникација на граѓанските организации активни во областа ан заштитата на животната средина со надлежните органи. Согласно направените анализи усогласувањето на законодавството е на средно ниво (освен клима), што дава доволна основа за спроведување на законодавството. Добро е разгрането и речиси сите области се покриени. Спроведувањето на законодавството е на почетно ниво, со исклучок на хоризонталното под-поглавје. Административните капацитети се недоволни, особено на локално ниво, како за спроведување, така и за инспекциски надзор. Финансирањето на животната средина е минимално (природа нема буџетско финансирање) што значително влијае на спроведувањето. Интегрирањето на политиките на животната средина во останатите политики на државата е на почетно ниво, при што Министерството за животна средина и просторно планирање не може да го направи интегрирањето без поддршка од другите сектори и препознавање како приоритет на Владата.