Пристигна „ВИ спа“: Дали би сакале да ве масираат роботи? (ВИДЕО)

Запознајте го Aescape — роботски систем за масажа кој комбинира вештачка интелигенција со најсовремена роботика за да понуди персонализирано и ефикасно искуство со масажата.

Веќе има роботи кои можат да готват, да прават пијалоци и автомобили за нас, но сега има еден што може да не разгали. Роботичката компанија Aescape соработувала со Lotte New York Palace за да го претстави првото комерцијално достапно, целосно автоматизирано искуство со масажа со вештачка интелигенција (ВИ).

Хотелскиот Only Spa почна да нуди приспособливи роботски масажи на своите гости, а 30-минутниот третман чини 75 долари. За споредба, имајте на ум дека 60-минутната масажа изведена од човек чини 260 долари во истиот спа центар.

Aescape не е хуманоиден робот како, да речеме, Tesla Optimus или Boston Dynamics Atlas, подобро би се опишал како кревет за масажа со две роботски раце кои можат да работат на сите точки на вашето тело. Автоматската масажа користи напредна технологија на вештачка интелигенција за да создаде 3Д компјутерски модел на секој клиент пред да испорача персонализирана масажа прилагодена на неговото тело, наведува Aescape.

Елегантниот Lotte New York Palace е првиот хотел со пет ѕвезди кој е партнер со Aescape, но изгледа нема да биде последен. Стартапот со седиште во Њујорк, основан од претприемачот Ерик Литман во 2017 година, исто така соработуваше со луксузната фитнес компанија Equinox и во блиска иднина ќе започне да нуди роботски масажи на одредени локации ширум Њујорк.

Нема да биде изненадување доколку другите големи брендови се осмелат на овој чекор. Глобалната велнес туристичка индустрија се очекува да достигне 1,2 трилиони долари до 2027 година, што значи дека хотелите и одморалиштата можат да заработат големи профити со инвестирање и подобрување на нивните спа центри.

Меѓутоа, Aescape не е ограничен само на хотели и теретани. Компанијата започна да работи со Press Modern Massage Union Square во мај, додавајќи дека програмата за ран пристап создала растечка листа на чекање на њујорчани желни да ги искусат нејзините револуционерни масажи.

Aescape исто така се подготвува да објави уште повеќе партнерства со „лидерите во индустријата“ во угостителството, спортот, бизнисот и недвижностите во текот на следната година.