Покрај еден од најскапите автопати во светот, шета стадо овци – не се знае кога ќе биде довршен

„Возењето по единствениот автопат во Црна Гора е надреално искуство. Имаме пат покрај кој шета стадо овци“. Ова е впечатокот на новинарот нa BBC, од пробното возење по првата делница на автопатор Бар – Бољаре, од Смоковац до Матешево.  Во опширниот текст, чија централна тема е кинескиот долг на европските држави, авторот постсетува дека за овој проект Црна Гора се задолжила речиси една милијарда евра.

„ Долго замислуваната идеја за брз пат, имала за цел зајакнување на трговијата во оваа балканска земја – поврзување со пристаништето Бар, до границата со Србија. Но, неколкуте студии за изводливост заклучиле дека тоа би било премногу сложено и прескапо“, пишува BBC. Потоа на сцена стапуваат кинеските државни кредитори.

„Шест години по почетокот на градежните работи, изградени се само 41 километар, со што ова е еден од најскапите автопатишта на светот“, се истакнува во текстот.  Авторот ја опишува делницата како објект изграден од мостови и тунели „исклесани во природата“, но исто така додава дека целиот проект е оптоварен со обвинувања за корупција и дека доцни две години. Некои се прашуваат и дали воопшто некогаш ќе се заврши. Текстот потсетува и на спорните детали од договорот со кинеската EXIM банка, која обезбеди средства за изградбата. Се истакнува преголемата улога на официјален Пекинг во одлучувањето, вклучувајќи ја и заплената на државниот имот во случај Црна Гора да не биде во можност да го враќа кредитот, вклучувајќи го тука и пристаништето Бар.