Почина познатиот уругвајски архитект Рафаел Вињоли

Светот на архитектурата се збогува со реномираниот уругвајско-американски архитект Рафаел Вињоли, кој почина на 2. март 2023. година на 78-годишна возраст. Со повеќе од половина век искуство во професијата, Вињоли беше познат по своите смели и импозантни проекти изградени во различни градови низ светот.

Меѓу неговите најпознати дела се аеродромот Carrasco во Монтевидео, кој стана позната порта на Уругвај, Бостонскиот конгресен центар, кој го редефинираше урбаниот простор во тој американски град, контроверзната 20 Fenchurch Tower во Лондон, облакодер висок 160 метри, кој доби остри критики за неговото влијание врз животната средина, објектот Tokyo International Forum, а исто така познат е и неговиот препознатлив облакодер 432 Park Avenue на Менхетн.

аеродромот Carrasco во Монтевидео

Од Монтевидео до Големото јаболко

Роден е на 1. јуни 1944. година во Монтевидео, Уругвај, студирал архитектура на Факултетот за архитектура и урбанизам на Универзитетот во Буенос Аирес, дипломирал во 1969 година. Подоцна се придружил на архитектонското биро MSGSSV и го изградил комплексот Terraces of Manantiales и зградата на ТВ станицата АТС Argentina Televisora Color.

Tokyo International Forum

Во 1978 година, поради владеењето на воената хунта во Аргентина, со родителите емигрирал во Соединетите Американски Држави и се вработил како предавач на Харвард. Пет години подоцна, основал своја архитектонска пракса во Њујорк – Rafael Viñoly Architects, која денес има канцеларии и во Пало Алто, Лондон, Манчестер и Абу Даби.

Во текот на својата кариера Вињоли добил бројни награди и признанија, меѓу кои и Медал на честа од Американскиот институт за архитекти, Повелба на градот Њујорк и Националната награда за дизајн од музејот за дизајн Cooper-Hewitt Smithsonian, пишува ArchDaily.

20 Fenchurch Tower во Лондон

Смртта на Вињоли е голема загуба за архитектонската заедница и нè поттикнува да размислиме за наследството на овој голем творец. Неговиот препознатлив стил и посветеност на енергетската ефикасност и функционалност во архитектурата ќе продолжат да ги инспирираат идните генерации архитекти да создаваат иновативни простори кои ги поместуваат границите.