По консултација со стручната јавност преовлада разумот за изградба на нов Клинички центар

Министерот за здравство Венко Филипче на денешната прес конференција најави дека новиот Клинички центар ќе се гради во Злокуќани. Тој порача дека во близина на специјалната болница во Бардовци, се планирани и медицински факултет, истражувачки центар и кампус за сместување на студенти по медицина.
Според него, тоа ќе биде мал медицински град со лесен пристап за сите граѓани. Одлуката за дислокација, како што наведе Филипче, е донесена по широки консултации со лекарите, архитектите и граѓаните. Изградбата на новиот Клинички центар се очекува да почне за година и пол, а да трае четири до пет години.

За постоечката локација министерот изјави: „Тоа место е угушено. На тоа место дури и со новиот проект немаше да се постигне добро сообраќајно решение. Немаше да има доволно паркинг места и улицата Водњанска и натаму ќе останеше тесно грло, особено за граѓаните кои живеат во околината, а истовремено немаше да обезбеди добар пристап до болничката услуга. Новиот проект немаше да ни обезбеди модерен Клинички центар како во развиените земји“.
Министерот за здравство посочи дека постојат одредени финансиски обврски согласно предходно потпишаниот договор за изградба на Клинички центар, но Владата ќе се обиде да договори ново решение и да не се плаќаат пенали.