Пирамидален облакодер во центарот на Париз

По долга битка, „Tour Triangle “ е подготвен да стане највисокиот облакодер изграден во центарот на Париз по 1973 година. Управниот суд во Париз ја потврди градежната дозвола издадена во април 2015 година, отфрлајќи ги жалбите против зградата. Најновата одлука треба да го отвори патот за да почне изградбата на кула висока 180 метри. Приговорите беа дека проектот ќе влијае на карактерот и интересот на соседните локалитети и монументалните перспективи. Проектот го направи компанијата Herzog & de Meuron.

Изведувачот Unibail-Rodamco има намера да ја почне изградбата на кулата во 2020 година, со цел да се заврши за Олимписките игри во 2024 година. Оваа кула ќе биде една од серијата висококатници со повеќе од 100 метри која ќе се гради во Париз, надвор од бизнис-областа „La Defense“. Забраната за изградба на објекти над седум спрата во градот беше донесена две години по изградбата на кулата „Tour Montparnasse“ која беше завршена во 1973 година.

Herzog & de Meuron прв го откри проектот за пирамида облакодер во 2008 година, а изградбата првично беше планирана да биде завршена до 2014 година. Се планира да биде изградена веднаш до „Porte de Versailles“. Обликот на пирамидата ќе изгледа различно во зависност од тоа каде се гледа. Од централниот дел на Париз, зградата ќе изгледа како тенка кула, но ќе биде во целосна форма од исток и запад.

Кулата ќе има 42 ката и во неа ќе биде хотел со 120 соби и деловен простор за 5.000 лица, заедно со здравствен центар и дневна соба.

„Tour Triangle “ ќе биде трета највисока зграда во центарот на Париз.