Picasso.mania во „Гран Пале“ во Париз

Во музејот „Гран Пале“ во Париз, отворена е изложба посветена на големиот шпански и светски уметник Пабло Пикасо (1881-1973).

Со наслов Picasso.mania, поставката го „конфронтира“ славниот уметник со познатите сликари коишто тој со својата уметност ги инспирирал.

Првиот дел од изложбата ја претставува фигурата и личноста на уметникот како тема, вклучувајќи го и автопортретот на Пикасо од неговиот „син период“.

Потоа следи дел за визуелните уметнички револуции, како што бил кубизмот, и на крајот дел во кој се претставени „траги“ од политичкиот ангажман на Пикасо.

„Веќе со 20 години тој бил познат, а со 90 години тој се уште работел по една слика на ден, така што „пикасоманијата“ трае и натаму. Во текот на 70 години од неговата кариера, направил илјадници дела и создал мноштво на стилови“, истакнале авторите на изложбата.

„Без разлика дали го сакате или не, Пикасо е невозможно да се избегне. Фасцинантно е како повеќето уметници го користеле за да се најдат себеси“, изјавила на изложбата Дијана, правнуката на Пикасо, за француската телевизија „Франс 3“.