„Паркинг на иднината“: Каде што иновацијата се среќава со одржливоста (ВИДЕО)

Во Кина во метрополата Hangzhou, позната по својата динамична урбанизација и технолошки иновации, новиот концепт за паркирање ја менува играта. „Паркингот на иднината“ (Future Car Park), како што се нарекува овој архитектонски бисер, не е само место каде што го оставате вашиот автомобил – тоа е симбиоза на модерна технологија и одржлив дизајн, место каде што се сретнуваат градскиот живот и природата.

Скулптурната зграда во централната деловна област на Hangzhou е проектирана да складира 500 возила во низа кули слични на дрво кои ја сочинуваат нејзината органска форма.

Future Car Park проект на Daniel Statham Studio содржи целосно автоматизиран систем за паркирање. Автомобилите влегуваат во зградата во подрумот, се превземаат на влезот без возачи. Оттука, автомобилите се носат на паркинг места избрани од автоматизираниот систем, кој континуирано ги прилагодува овие аранжмани во текот на денот во зависност од проценетото време на подигање од страна на сопствениците. Овој систем со роботски платформи е произведен од страна на лидерот во индустријата HikVision.

Овој монументален објект се простира на 30.740 квадратни метри, а неговата силуета ја формираат десет импресивни кули. Секоја кула е внимателно дизајнирана, комбинирајќи ја функционалноста со естетиката. Додека автомобилите се паркираат во внатрешноста на овие кули со помош на софистицираниот роботски системи, покривот на овој комплекс се трансформира во зелена оаза со поглед кој го одзема здивот.

Проектантското биро Daniel Statham, мозокот зад овој проект, внимателно го осмислил секој детал. Централните кули служат како срце на системот за автоматско паркирање, додека другите кули се опремени со лифтови, обезбедувајќи им на посетителите брз пристап до паркот на кровот. Покрај тоа, дизајнот на кулите е инспириран од природата – тие делуваат како крошни на дрвја, обезбедувајќи сенка и заштита од временски непогоди.

Меѓутоа, она што навистина го издвојува „Паркингот на иднината“ е неговиот одржлив дизајн. Фасадата е конструирана да овозможи максимална природна вентилација и светлина, намалувајќи ја потребата од вештачко осветлување и климатизација. Систем за собирање дождовница се користи за наводнување на паркот на кровот, додека соларните панели ја намалуваат потрошувачката на електрична енергија, што го прави комплексот енергетски ефикасен.

Овој проект е само врвот на ледениот брег кога станува збор за иновациите во Hangzhou. Градот моментално е домаќин на голем број амбициозни проекти, вклучувајќи парк на рафинерија за нафта, голем спортски центар и серија футуристички облакодери кои дополнително ќе го збогатат хоризонтот на градот.

Во ера кога градовите ширум светот се борат со сообраќајниот метеж и загадувањето, Future Parking поставува нов стандард, покажувајќи како иновациите и одржливоста можат да одат рака под рака, создавајќи подобра иднина за сите нас.