Париз ќе забрани туристички автобуси во центарот на градот

Градската управа на Париз планира да забрани влез за туристичките автобуси во центарот на француската престолнина. Намерата е да ги поттикнат посетителите да пешачат, возат точаци или користат јавен превоз, изјави заменик градоначалникот Емануел Грегоар.

Тој наведува дека управата сака да одговори на жалбите во однос на непријатностите кои се предизвикани од масовниот туризам.
Грегоар нагласува дека ситуацијата во Париз не толку лоша како во Венеција или Барселона, но дека парижаните се загрижени поради приливот на туристичките автобуси.
„Не сакаме веќе тотална анатхија на туристички автобуси во Париз. Автобусите повеќе не се добродојдени во самото срце на градот“- истакнува Грегоар.

Париз е полн со двокатни автобуси кои превезуваат туристи од еден до друг споменик, како и меѓународни туристички автобуси со кои доаѓаат туристи од разни делови на Европа.
Грегоар вели дека градската управа го чека носењето на законот како би се намалило движењето на автобусите и дека ќе направат и места за паркинг вон градот за автобусите повеќе да не влегуваат во центарот.
„Туристите како и сите останати можат да се префрлат на начини на дивижење кои одговараат на животната средина или да користат јавен превоз“, вели Грегоар и додава дека туристичките водичи би требало да се прилагодат на организирање велосипедски тури или пешачење.
Минатата година Париз и околината на градот ги посетиле рекордни 50 милиони туристи.