Палео парк на Истра со силуета на диносаурус

На територијата на општина Бејл, во Истра, недалеку од Ровињ, изграден е Палео парк според проектот на архитектонската компанија NFO, кој комбинира забава и едукација за диносаурусите. А, зошто токму тука?

Имено, во текот на 1992 година, коските на диносаурусите се појавиле во заливот Колона, на бреговите на Бејл. Се претпоставува дека дури десет видови диносауруси живееле на овие простори, вклучувајќи го брахиосаурусот, односно еден од најголемите што одел по Земјата и чија тежина била до 30 тони, а должината од 20 до 25 метри.

Поради ова историски значајно откритие, Бејл влезе во Светскиот список на палеонтолошки локалитети, а тоа е особено важно затоа што оваа локација е единствената во светот каде што се пронајдени фосилизирани остатоци од диносаурус под морето, а се претпоставува дека некои од нив се стари дури 200 милиони години. Сега може да се посети ова место и да се ужива во прекрасната архитектура.

Палео паркот се наоѓа во рамките на кампот Мон Перин, и претставува комбинација од забавен воден парк и едукативен истражувачки полигон, а целта на комплексот е да се популаризира на овој начин и да го приближи овој археолошки локалитет до луѓето.

Комплексот, организиран на површина од 16 илјади квадратни метри, содржи разновидни затворени простории лоцирани под зелени покриви кои со своите флуидни форми, многу убаво се вклопуваат во околните отворени простори и целата конфигурација на теренот.

Веројатно најинтересниот сегмент на комплексот се отворените водни површини со силуета на диносаурус, што може јасно да се забележи при одење по патеките на покривите на зградите.

Комплексот се состои од влезна сала со рецепција, голем базен, детски базен, базен каде може да се ужива во топли бањи, затворен угостителски објект, кој има покриен бар на отворено, и има бањи, простории за сончање и продавница за сувенири.

Заедно со базените, има неколку скулптури во димензии на диносауруси во природна големина, а како дел од „археолошкиот локалитет“ на децата, во песокот може да се видат коски на диносауруси, а при одење по покривот, може да се следи развојот на влекачите на Земјата.

За време на проектирањето, се внимавало да не се наруши постојната природна средина, со цел да се зачува автохтоната вегетација.

Како таков, Палео паркот е секако одличен пример за туристичка локација која е дизајнирана на начин да биде комерцијален, но со доза на едукативен карактер да ја претстави историјата на забавен начин.