Осло, Амстердам и Хелсинки предводници кон одржлива мобилност

Европските градови кои во моментов се најблиску до постигнување на нула емисии во транспортниот сектор се Осло, Амстердам и Хелсинки. Сепак, зазеленувањето треба да се забрза и бара соработка од сите актери, инаку ниту еден од градовите нема да може да ја ослободи мобилноста од загадувањето до 2030 година. Ова е заклучокот од новата студија спроведена од коалицијата на невладини организации Clean Cities Campaign.

Според Европската комисија, околу една четвртина од стакленички гасови во Европа доаѓаат од сообраќајот, што е една од клучните причини за високото загадување на воздухот во урбаните центри. Загадувањето на воздухот го оштетува речиси секој орган, па дури и клетка во човечкото тело. Она што е особено загрижувачко е што овој сектор, за разлика од сите останати, не бележи постепено намалување на штетните емисии. Најголем емитер е патниот транспорт, а на граѓаните им се советува да се префрлат на поодржливи форми на движење како што се пешачење, возење велосипед, јавен превоз како за да се намалат идните зголемувања на глобалните просечни температури така и за сопственото здравје.

Меѓутоа, за да оживеат практиките за зелен транспорт, властите треба да обезбедат одредени првични услови, како што се гарантирана безбедност на пешаците, широка мрежа на автобуски линии или воспоставување зона без автомобили. А понекогаш стимулациите како што се субвенциите за купување на електричен велосипед добро доаѓаат.

Увид во досегашниот успех на европските градови на ова поле даде Clean Cities Campaign. Авторите рангираа вкупно 36 градови во пет категории: простор погоден за луѓето, безбедност на патиштата, пристап до транспорт погоден за климата, регулаторна рамка и чист воздух.

На овој начин дознале дека најдобар квалитет на воздухот нуди Хелсинки, дека можете безбедно да се движите низ Осло и Виена, а сообраќајниот метеж е секојдневен предизвик и извор на нервоза кај жителите и посетителите на Краков и Неапол. Овие два града во моментов се најлошо рангирани кога станува збор за одржливиот транспорт и немаат постигнато големи резултати во ниту една од петте категории.

Покрај Осло, Амстердам и Хелсинки, добар потенцијал за декарбонизација на сообраќајот имаат и Копенхаген и Париз.

Покрај тоа што носи помало загадување на воздухот и подобро здравје, одржливиот транспорт има и позитивни ефекти врз климата, нашата меѓусебна поврзаност и целокупната благосостојба. Поради оваа причина, Clean Cities Campaign ги советува локалните носители на одлуки, истражувачите и граѓанското општество да работат заедно за да го трансформираат сообраќајот.

Нашата иднина зависи од активностите што лидерите ги преземаат денес, се заклучува во студијата.