Сегмент од јавниот превоз во Истанбул кој е еден од најдобрите во Европа – Bus Rapid Transit Metrobüs

Градовите ширум светот се во постојана потрага по поефикасен и поодржлив јавен транспорт. Едно од подобрите решенија, без сомнение, е концептот на брз автобуски превоз (Bus Rapid Transit – BRT), кое веќе има широка примена и во развиените земји и во земјите во развој. Истражувањата покажуваат дека денес BRT може значително да го скрати времето на патување. На пример, корисниците на BTR во Истанбул можат да заштедат дури 28 дена годишно (или 52 минути дневно) доколку ги заменат вообичаените опции на превоз со BRT.

Истражувањето спроведено од страна на EMBARQ, под наслов „Социјални, еколошки и економски влијанија на BRT системите“ (Social, environmental and economic impacts of BRT systems) содржи длабински спроведени студии на случај за BRT системите во Богота, Мексико Сити, Јоханесбург и Истанбул. Заклучокот е дека овој концепт го подобрува квалитетот на живот преку следните индикатори: скратување на времето на патување, намалување на емисиите на штетни гасови и цврсти честички, зголемена безбедност во сообраќајот и поголема физичка активност.

По својата суштина BRT е автобуски  јавен транспорт  проектиран со цел подобрување на капацитетот и доверливоста споредено со конвенционалниот автобуски превоз. Типично, овој концепт  вклучува посебен дел од улицата резервиран за автобусите и дава приоритет на овој тип на превоз кај сите крстосници односно вкрстувања со другите видови на сообраќај. Со еден збор, BRT системот ги комбинира капацитетот и брзината на метрото, со флексибилноста, ниските трошоци и едноставноста на автобускиот превоз.

Првиот ваков систем во светот е направен во Бразил во Куритиба во 1974 година. Денес, најголемиот BRT систем во светот е оној во Џакарта со вкупна должина на линиите од 210 километри.

Овој систем се покажал особено успешен  во Истанбул, и со својата ефикасност успева да му овозможи на 15-милионскиот град, кој се гуши во сообраќајниот хаос и дискутабилната сообраќајната култура, да опслужува 800.000 корисници дневно. Системот во Истанбул функционира од 2007 година како уште една компонента на постоечката мултимодална транспортна мрежа на градот.

Истанбулскиот Metrobüs е еден од најкористените и најефикасните  BRT системи во Европа со просечна брзина од 35 km/h. Според податоците од компанијата IETT, која управува со јавниот превоз во Истанбул, секоја година се превенираат најмалку пет фатални несреќи благодарение на поголемата безбедност во сообраќајот кај овој вид транспорт. Metrobüs има добиено т.н „сребрен рејтинг“ (silver rating) за BRT стандард, и прави постојани напори за зголемување на капацитетот, градење на нови коридори и ширење во нови делови на градот.