Одгледување на банани во домашни услови

Бананите имаат плодови кои ги содржат витамините Б6, Ц и калиум, вкусни се и многу често се користат за подготовка на најразлични десерти. Бананите претставуваат егзотично растение кое за да се одгледува во наши услови претставува вистински предизвик за секој пасиониран градинар.

Местото каде што сакате да ја засадите или да го поставите садот со растението треба да биде мошне просторно, за самото растение да може непречено да се развива, бидејќи може да достигне и до седум метри во височина, а листовите да му се разгранат до 2,5 метри во широчина.

Следниот услов кој треба да се обезбеди е светлината. Со оглед на тоа што е вид на кој му е потребна топла почва, треба да му се обезбеди сончева експозиција.

Во однос на одгледувањето треба да се посвети внимание на повеќе работи. Првенствено треба да се потсекуваат старите и долги корења, за да им се даде можност повторно да се развијат.

Истото важи и за сувите листови. Најдобро е секогаш да се оставаат од пет до седум листови за да не дојде до засенчување на почвата околу растението.

Полевањето мора да биде секој ден. Прихранувањето на бананите е со течно ѓубриво, еднаш месечно во вегетативниот период.

Треба да се прскаат за да се заштитат од лисни вошки и трипс.

Во наши услови зимно време треба да се заштити од премрзнување. Најдобро е да се користи текстил или јута.

Во случај да се користи најлон, најдобро е да се обезбедат дупки за вентилација за да не дојде до кондензација и скапување на стеблото.