Одбележани 67 години од основањето на Градежниот факултет со 34 стипендии за најдобрите студенти

По повод Ден на Градежен факултет во Скопје, на 6 октомври, како и секоја година, се одржа свечената манифестација во АМФ театарот, на која беа промовирани и новите стипендисти на Фондацијата за стипендирање на најуспешните студенти, формирана во 2004 година. Исто така, традиционално беше доделена и награда за најдобра дипломска работа од областа на челичните конструкции која традиционално ја доделува АД ФАКОМ од Скопје.

Оваа година, се одбележа шеесет и седмата годишнина од основањето на Градежниот факултет при Универзитетот „Св. Кирил и Методиј“ во Скопје, на која присуствуваа студенти, декани, продекани, директори на институти, директори на јавни претпријатија и претставници на градежните компании.

Пред присутните со свој говор се обрати деканот на Градежен факултет, проф. д-р Дарко Мославац, кој потсети на почетоците на факултетот и на првиот наставен час на тогашниот Технички факултет со два оддела, Градежен и Архитектонски, кој заедно со уште неколку други факултети го имаат оформено Универзитетот „Св.Кирил и Методиј” во Скопје.

Професорот Мославац рече дека организацијата на Градежниот факултет е втемелена на вкупно 14 катедри организирани во пет оддели. До денес на Градежниот факултет дипломирале над 3740 (3743) градежни инженери, над 440 (446) геодетски инженери, над 100 (105) геотехнички инженери и други кадри.

Покрај дипломирани инженери до моментов магистрирале и докторирале 292 магистри по градежништво, 55 магистри по геодезија и 96 доктори на науки.

Во чест на празникот, оваа година беа доделени 34 стипендии за 34 студенти, а оваа година добитник на наградата за најдобра дипломска работа од областа на челичните конструкции е студентот Стефан Мицевски за дипломската работа под наслов „Проект за катна гаража со четири платформи и димензии во основа 52х52m“, на кого наградата му ја додели директорот на монтажа на АД ФАКОМ Скопје, Димче Галовски.