Нови ознаки за енергетска ефикасност на апаратите за домаќинство

За три години, апаратите за домаќинство ќе носат нови ознаки за енергетска ефикасност. Наместо досегашните кои ги вклучуваа и за многумина збунувачките „+“ знаци, новите ознаки ќе бидат во опсегот од „А“ до „G“, при што „А“ означува најниска а „G“ највисока потрошувачка на енергија. „Плусевите“ се укинуваат. Ова е договорено меѓу преговарачите од Европскиот парламент и Совет. Овие нови ознаки во трговијата ќе бидат видливи дури во 2020 година, а скалата во иднина ќе се надоградува, откако 30% од производите кои се во продажба ќе припаѓа на енергетската класа „А“. Новиот систем на означување ќе биде дефиниран со низа делегирани акти.

Истражувањата покажуваат дека дури 85% од потрошувачите при купувањето на апарат за домаќинство, одлучуваат и врз основа на неговата енергетска ефикасност. Во план е воспоставување на база на податоци со цел купувачите да можат да ја споредуваат енергетската ефикасност на уредите.