Нориљск, еден од најсеверните градови во светот и најзагадениот град во Русија

Сибирскиот град Нориљск се наоѓа 400 километри над Арктичкиот круг и е еден од најсеверните градови во светот. Има 177.000 жители и има уште еден неславен епитет – најзагаден град во Русија.

Градот е изолиран, забранет е за туристи, и изграден е врз рушевините на некогашните логори за присилна работа од времето на Сталин.

Климата во овој град е екстремна – просечните температури во јануари се -26 степени Целзиусови, а најниските температури одат и под -50 степени. Речиси три месеци годишно во градот нема дневна светлина. Во јуни и јули пак се т.н „бели ноќи“, а тајната за опстанокот на овој град лежи во богатството со метали. Станува збор за  едно од највредните наоѓалишта на светот, односно метални резерви од околу 2 милијарди тони. Градот е еден од најголемите производители на никел и најголем извор на паладиум во светот, а има и значителни количини на јаглен. Некогаш рудниците биле под контрола на државната компанија која е приватизирана во 1993 година и оттогаш го носи името Nornickel. Рудниците вработуваат околу 80.000 луѓе, а со цел да се привлечат луѓето да живеат во ова изолирано место, им се нудат релативно повисоки плати.

За жал рударството создало ноќна мора за животната средина во ова место. Нориљск е константно прв на листата најзагадени градови во Русија, посебно поради високата концентрација на сулфурен диоксид. Според овој параметар, тој е на прво место по загаденост и во светски рамки. Поради тоа, уништени се огромни шумски површини. Смртноста предизвикана од респираторни заболувања е повисока отколку во цела Русија заедно.  Дополнителна причина за вознемиреност е топењето на пермафростот врз кој е изграден градот, поради порастот на глобалните температури.