Nine X Nine во Индија: Смела игра на волумени и флуидни форми (ВИДЕО)

Во срцето на Gandhinagar, Индија се наоѓа Nine X Nine, проект кој комбинира иновативен дизајн и одржливост…

Создаден од реномираното студио Sanjay Puri Architects, овој дом е пример за современа архитектура која се потпира на природни елементи за да обликува простор кој е и функционален и интегриран во неговата околина.

Со смела игра на волумени и флуидни форми, куќата е проектирана природно да се прилагодува на теренот и околината. Девет постоечки дрвја се задржани на јужната страна на парцелата од 3.311 квадратни метри од кои две се интегрирани во пространи отворени тераси, додека другите ја опкружуваат структурата, создавајќи хармоничен дијалог помеѓу архитектурата и природата.

Пристапот до имотот е сместен помеѓу густи дрвја на северозападниот агол, создавајќи постепено откривање на домот по влегувањето. Паметното планирање на просторот овозможува куќата да биде обликувана во форма на Т, со централна оска што се разгранува исток и запад, додека спиралните скали во центарот ја додаваат динамиката на просторот. Структурата е развиена преку три нивоа – приземјето како влезно ниво, горниот кат со приватни простории и подземното ниво посветено на рекреација и уметност.

Посебен шарм дава спуштениот двор на западната страна, кој носи природна светлина и вентилација на подземното ниво. Оваа зелена оаза е поврзана со градината со отворени скали покрај брановиден ѕид, по кој тече водопад, додека плиток рефлектирачки базен на североисток придонесува за пасивно ладење на просторот. Во овој двор се зачувани вкупно шест дрвја, додека во југоисточниот дел на имотот се зачувани уште три дрва.

На ниво на приземје има пространи заеднички зони – дневна соба, трпезарија, кујна и соба за гости, додека три спални соби се сместени на катот, секоја со поглед кон градината и дрвјата. Подземното ниво е резервирано за забава и уметничка галерија, што го одразува личниот афинитет на сопственикот кон уметноста.

Сите внатрешни простори се отвораат кон пространи конзолни тераси, кои комбинираат покриени и отворени сегменти, обезбедувајќи можност за прилагодување на различни временски услови. Длабоките настрешници и стратешките отвори обезбедуваат сенка, намалувајќи ја потребата за климатизација дури и во текот на топлите летни месеци кога температурите достигнуваат до 50°C.

Ентериерите ги карактеризира минимализам со бел мермерен под, дрвен мебел и суптилни акценти, додека одржливоста се рефлектира во употребата на природни материјали, рециклирање на вода, собирање дождовница и оптимизација на природното осветлување. Благодарение на паметно проектирање, Nine X Nine функционира без потреба од климатизација во поголемиот дел од годината, што значително го намалува енергетскиот отпечаток на домот.