Наскоро прва централа на биогас од градски отпад во Подгорица

Подгорица и Црна Гора наскоро ќе ја добијат првата електрична централа на биогас, каде од отпад ќе се произведува електрична енергија. Проектот го реализира градското комунално претпријатие „Депонија“. Се работи за едно од најорганизираните претпријатија во Подгорица кое вработува околу 150 луѓе и се занимава со изградба, користење и одржување на депонии за комунален отпад, рециклирање на метални и неметални отпадоци, како и со трговија со секундарни суровини.

Најавениот амбициозен проект ќе биде реализиран во форма на јавно приватно партнерство, а компанијата партнер ќе биде избрана на тендер кој треба да се објави наскоро со оглед на фактот што целокупната техничка односно проектна документација е веќе подготвена. Вредноста на оваа инвестиција е проценета на два милиони евра, а когенеративната постројка истовремено ќе произведува електрична и топлинска енергија. Доколку се запазат сите предвидени рокови, се очекува објектот да биде во функција до крајот на оваа година. Се работи за прв проект од ваков вид во Црна Гора, додека во регионот ваква постројка има само во Словенија.