Најголема поплава во последниве 22 години во Венеција

Во Венеција деновиве нивото на морето порасна за 115 сантиметри, па познатиот плоштад Свети Марко се најде под вода, извести италијанската метеоролошка служба и додаде дека станува збор за најголемата поплава во последниве 22 години.
Поради високата плима поплавена е пешачката зона на градот, којашто е само до 35 сантиметри над нивото на морето.
Причината за оваа појава е временското пореметување над Британија, кое предизвикува лошо време и во поголемиот дел од Европа, вклучително и силните ветришта на Јадранското Море.
Во Венеција ноќта од средата кон четврток почнало да дува ветер со брзина од 50 до 70 километри на час, а воздушниот притисок паднал од 1022,8 на 991 хектопаскали.

Од 1993 до 2002 година Венеција беше поплавена педесетина пати, но најголемата поплава е забележана на 4-ти ноември 1966 година, кога водостојот бил 194 сантиметри над нивото на морето.